आइतबार, श्रावण ३१ गते २०८३
काठमाडौं । धनुषाबाट प्रहरीले चाइनिज पेस्तोलसहित दुई जनालाई पक्राउ गरेको छ ।
क्षिरेश्वरनाथ नगरपालिका-१ रम्दैया बस्ने ४२ वर्षीय जितेन्द्र कुमार यादव र सोही ठाउँ बस्ने ३० वर्षीय कुमोद नारायण झा पक्राउ परेका हुन् ।
उनीहरुको साथबाट प्रहरीले ठूलो चाइनिज पेस्तोल जस्तो देखिने पेस्तोल १ थान, त्यसको गोली ७ राउण्ड र १ थान म्याग्जिन शनिबार राति बरामद गरेको हो ।
जनकपुर उपमहानगरपालिका-१ भानुचोकमा बा.१४ च ७४५९ नम्बरको कारले ज.९ प ४८०६ नम्बरको मोटरसाइकललाई ठक्कर दिई दुर्घटना भए पश्चात् कारलाई चेकजाँच गर्ने क्रममा उक्त हतियार बरामद भएको प्रहरीले जनाएको छ । कारका चालक जितेन्द्र र कारमा सवार कुमोदलाई प्रहरीले नियन्त्रणमा लिएर अनुसन्धान गरिरहेको छ ।
कारको ठक्करबाट घाइते भएका मोटरसाइकल चालक महोत्तरी पिपरा गाउँपालिका-५ बस्ने २० वर्षीय पारस कुमार यादव र मोटरसाइकलमा सवार हंसपुर नगरपालिका-२ बकचौरा बस्ने ३० वर्षीय शिव कुमार मण्डललाई उपचारका लागि धनुषा अस्पतालमा पठाइएको प्रहरीले जनाएको छ ।
